1UM-TeamUrdu

ظہورِ نورِ مکمل بہت مبارک ہو

Rate this Entry
ظہورِ نورِ مکمل بہت مبارک ہو
اس مناسبت سے کچھ نعتیہ کلام پیش خدمت ہے۔ ہمیشہ کی طرح حوصلہ افزائی اور پیام پھیلانے میں تعاون کیجیے۔ شکریہ
#RabiulAwwal #EidMiladunNabiصلى
****************************************
1 :: اِتنا خوش رَنگ کہ خوابوں کا نگر لگتا ہے
****************************************
اِتنا خوش رَنگ کہ خوابوں کا نگر لگتا ہے
گنبدِ سبز سے یہ شہر گہر لگتا ہے

معذرَت اِہلِ مدینہ یہ جسارَت ہے مگر
ایک ہستی کے طفیل اَپنا ہی گھر لگتا ہے

پاؤں آقا نے اِنہی گلیوں میں رَکھے ہوں گے !
پاؤں رَکھتے ہُوئے ایمان سے ڈَر لگتا ہے

پلکیں جھاڑُو کے تصور سے دَمک اُٹھتی ہیں
راستہ آپؐ کی گر راہ گزر لگتا ہے

ہجر میں آپؐ کے نمناک فقط آنکھ نہیں
خون سے سینے میں کچھ اور بھی تر لگتا ہے

طاعتِ اَحمدِ مُرسلؐ کا شجر دِل میں لگا
اِس پہ جنت کی بشارَت کا ثمر لگتا ہے

ناز ہو جس کو محمدؐ کی غلامی پر قیسؔ
آنکھ والوں کو وُہی اِہلِ نظر لگتا ہے
#شہزادقیس
.
****************************************
2 :: خوشبو سے رَقم کرتا ہے گُل تیرا قصیدہ
****************************************
خوشبو سے رَقم کرتا ہے گُل تیرا قصیدہ
تابندہ ستارے سَرِ دِہلیز خمیدہ

خامہ بنیں اَشجار یا اَبحار سیاہی
مرقوم نہ ہو پائیں گے اَوصافِ حمیدہ

ہر قلب کہاں فیض تری نعت کا پائے
ہر ذِہن کہاں عشق میں آہُوئے رَمیدہ

آقا تری رَحمت کے سمندر پہ نظر ہے
اَعمال میں سستی ہے مگر پختہ عقیدہ

یعنی میں مدینہ کی فَضاؤں میں کھڑا ہُوں !
حیران ہیں اَفکار تو نمناک ہے دیدہ

گُل آپؐ کی خاطر چنے با عرقِ ندامت
شبنم سے شرابور ہیں گُل ہائے چُنیدہ

یہ کہہ کے قلم قیسؔ مرا تتلی نے چوما
خوش بخت ہو لکھتے ہو محمدؐ کا قصیدہ
#شہزادقیس
.
****************************************
3 :: جو یہاں زیر ہُوا سب کو زَبر لگتا ہے
****************************************
جو یہاں زیر ہُوا سب کو زَبر لگتا ہے
اِس لیے سب سے حسین آپؐ کا دَر لگتا ہے

ہم بھی پردیس میں جاں جانے سے ڈَرتے ہیں حضور
پر مدینے میں کسے موت سے ڈَر لگتا ہے

سنگ دِل شخص پہ قرآن مؤثر کیوں ہے ؟
سنگ ریزوں کی تلاوَت کا اَثر لگتا ہے

چھوڑ کر گردِشی تسبیح ہُوا ہے دو نیم
عارِف قصۂ معراج ، قمر لگتا ہے

جو محمدؐ کا نہیں ، دُنیا کو وُہ جو بھی لگے
اِہلِ کردار کو وُہ شخص صفر لگتا ہے

ایک صلوات اِدھر پڑھتے ہیں نمناک قلوب
اور پھل دار شجر ایک اُدھر لگتا ہے

عالمِ مرگِ غلامانِ محمدؐ بھی قیسؔ
نُور ملبوس عقیدت کا سفر لگتا ہے
#شہزادقیس
.
****************************************
4 :: کُن کی اَذانِ ناز کا جوہر نبیؐ مِرا
****************************************
کُن کی اَذانِ ناز کا جوہر نبیؐ مِرا
خِلقت کی ہر بہار کا جھومر نبیؐ مِرا

رَوشن ہے کہکشاؤں میں حُسنِ محمدیؐ
سوچو تو کس قَدَر ہے منور نبیؐ مِرا

سیدؐ ، کلیمؐ ، اُمیؐ ، محمدؐ ، قویؐ ، خلیلؐ
منصورؐ ، حقؐ ، نذیرؐ ، مطہرؐ نبیؐ مِرا

طہؐ ، بشیرؐ ، عزیزؐ ، رَحیمؐ ، اَبطحیؐ ، منیرؐ
یسؐ ، اَمینؐ ، نورؐ ، مدثرؐ نبیؐ مِرا

نقشِ قدم رَسولؐ کا خوشبوئے دین ہے
نعلین بھی ہے جس کی معطر نبیؐ مِرا

تا حشر ، نعت خوانوں نے محنت تو کی مگر
قطرہ ہُوا بیان ، سمندر نبیؐ مِرا

معراج تھی فرشتوں کی حیرانگی کی رات
بے پر بھی اُترا قیسؔ ، فلک پر نبیؐ مِرا
#شہزادقیس
.
****************************************
5 :: اِس شعر میں لکھ ڈالا ہے بنیادی عقیدہ
****************************************
اِس شعر میں لکھ ڈالا ہے بنیادی عقیدہ
اَحمدؐ سا کوئی دُوسرا دیدہ نہ شنیدہ

جس کُن کی ہے تخلیق تری ذاتِ معظم
اُس کُن کے فضائل کا لکھے کون جریدہ

ہے علم بھی لازِم وَلے یہ ذِہن میں رَکھنا
پڑھ لکھ کے کوئی ہوتا نہیں عرش رَسیدہ

صد چاک ہے غفلت سے مگر تیری عِنایت
بھر سکتی ہے ہر عاصی کا دامانِ دَریدہ

اُٹھی ہیں مدینہ کو طلب گار نگاہیں
اُمت کے ہُوئے جاتے ہیں حالات کشیدہ

دامن مرا پُر کر دے ترے اَبرِ کرم سے
گلشن میں کھلیں پھول سرِ شاخِ بُریدہ

یہ بات کسی معجزے سے کم تو نہیں قیسؔ
ہم جیسے گنہ گار پڑھیں اُن کا قصیدہ
#شہزادقیس
.
****************************************
6 :: پلاتا ہے حق جس کو جامِ محمدؐ
****************************************
پلاتا ہے حق جس کو جامِ محمدؐ
وُہ اَشکوں سے لکھتا ہے نامِ محمدؐ

خِرد ، عشق ، تعلیم ، تقویٰ ہے لازِم
سبھی کیسے سمجھیں مقامِ محمدؐ

دُرُود اُن پہ جب جب پڑھیں بھیگی آنکھیں
اُترتا ہے دِل پر سلامِ محمدؐ

عبادَت کی معراج ، سبحانَ رَبی
خدا نے کیا کم قیامِ محمدؐ

کلامِ محمدؐ ، بحکمِ خدا ہے
کلامِ خدا ہے کلامِ محمدؐ

مجھے کاش محشر میں سہواً ہی سمجھیں
غلامِ غلامِ غلامِ محمدؐ

خدا حشر میں اُس پہ رَحمت کرے گا
ہے جس دِل میں قیسؔ اِحترامِ محمدؐ
#شہزادقیس
.
****************************************
7 :: شیرازۂ وُجود و بقا ذِکرِ مصطفےٰؐ
****************************************
شیرازۂ وُجود و بقا ذِکرِ مصطفےٰؐ
چھُو پائے گی نہ جس کو قضا ذِکرِ مصطفےٰؐ

اِس پر بھی پیار آتا ہے پروردِگار پر
کرتا ہے ہم سے بڑھ کے خدا ذِکرِ مصطفےٰؐ

مرہم طرح طرح کے بنے تن کے واسطے
من کے ہر ایک غم کی دَوا ذِکرِ مصطفےٰؐ

دیکھا ہے جب سے ذِکرِ خدا میں مگن اُنہیں
کرتی ہے تب سے غارِ حرا ذِکرِ مصطفےٰؐ

اِحمدؐ کا ذِکرِ کرنا بھی نعمت ہے ، رِزق ہے
وَرنہ کہاں ہم اور کجا ذِکرِ مصطفےٰؐ

پوچھا گناہ گاروں نے کیسے ملا مقام
ہر جنتی نے ہنس کے کہا ذِکرِ مصطفےٰؐ

اِک نُور کی لکیر گئی قیسؔ عرش تک
دِل کے حرم میں جب بھی ہُوا ذِکرِ مصطفےٰؐ
#شہزادقیس
.
****************************************
8 :: اَزَل سے معظم ہے نامِ محمدؐ
****************************************
اَزَل سے معظم ہے نامِ محمدؐ
فرشتوں سے پوچھو مقامِ محمدؐ

بشر عہدِ طفلی سے باہر تو نکلے
کریں گے سبھی اِحترامِ محمدؐ

محمدؐ کے دُشمن ہیں تا حشر اَبتر
خدا خوب لے اِنتقامِ محمدؐ

خلاصہ مکمل شریعت کا لکھ لو
حلالِ محمدؐ ، حرامِ محمدؐ

زکات اَب بھی پہنچے غریبوں کو گھر پر
مؤثر ترین اِنتظامِ محمدؐ

بہت ہو چکی ، اَب فقط ایک نعرہ
نظامِ محمدؐ ، نظامِ محمدؐ

خدا لیلیٰ اور قیسؔ کو بھی بنا دے
کنیزِ محمدؐ ، غلامِ محمدؐ
#شہزادقیس
.
****************************************
9 :: نبیؐ کی یاد دَھڑکن ہے ہمارا دِل مدینہ ہے
****************************************
نبیؐ کی یاد دَھڑکن ہے ہمارا دِل مدینہ ہے
جہاں اِحمدؐ کے عاشق ہوں وُہی محفل مدینہ ہے

مدینہ علم و عرفاں ، آگہی ، اَنوار کا مرکز
وُہ اِنسان اَصل اِنساں ہے جسے حاصل مدینہ ہے

حُضورؐ اُمّت کی خاطر رات بھر روتے تھے سجدوں میں
جہنم اور ہمارے بیچ بس حائل مدینہ ہے

مدینہ عام سا اِک شہر تھا سرکار دُنیا میں
کسی کامل کا صدقہ ہے کہ اَب کامل مدینہ ہے

اے میری نعت سن کر یادِ اِحمدؐ میں تڑپتے دِل
تیرے آنسو بتاتے ہیں تیری منزل مدینہ ہے

تلاطم خیز موجیں ہیں زَمانے بھر کے ہنگامے
سفینے پاک دِل اِنسان ہیں ، ساحل مدینہ ہے

مدینے کا بھکاری کہتے ہیں سب پیار سے مجھ کو
دُعاؤں میں مری قیسؔ اِس قَدَر شامل مدینہ ہے
#شہزادقیس
.
****************************************
10 :: جس کو بھی اِسمِ محمدؐ سے حیا آتی ہے
****************************************
جس کو بھی اِسمِ محمدؐ سے حیا آتی ہے
حشر میں اُس کے لیے سبز قبا آتی ہے

کچھ فرشتے بھی جماعت میں نظر آتے ہیں
جب تصور میں مرے غارِ حرا آتی ہے

ایک ماحول سا بن جاتا ہے رِندوں کے لیے
جب بھی جنت میں مدینے کی ہَوا آتی ہے

تیرنے لگتے ہیں بہتی ہُوئی نہروں میں چراغ
سجدے سے اُٹھتے ہی خوشبوئے حنا آتی ہے

دَف بجاتی ہُوئی حوروں کا نکلتا ہے ہجوم
جب بھی سرکارؐ کی آمد کی ندا آتی ہے

کاش ہو نظرِ کرم دِل کے حرم پر اُن کی
ہم گنہ گاروں کو بس ایک دُعا آتی ہے

نعت پڑھتے ہُوئے میں کانپ سا اُٹھتا ہُوں قیسؔ
سبز گنبد سے جو ٹکرا کے صدا آتی ہے
#شہزادقیس
.
****************************************
مفرد اَشعار
****************************************
اُتنا دوزَخ کی سزاؤں کا نہیں خوف مجھے
****************************************
اُتنا دوزَخ کی سزاؤں کا نہیں خوف مجھے
جتنا دو شکوہ کناں آنکھوں سے ڈَر لگتا ہے
#شہزادقیس
.
Utna Dozakh Ki Sazaaon Ka Nahi Khauf Mujhay
Jitna Do Shikwa Kunaan Aankhon Say Dar Lagta Hai
#ShahzadQais
****************************************
جمال ِ آدم و حوا کی کرنیں ان سے ہیں
****************************************
جمال ِ آدم و حوا کی کرنیں ان سے ہیں
حضور دنیا میں موجود پہلے دن سے ہیں
#شہزادقیس
.
Jamal -e- Aadam -o- Hawwa Ki Kirnain Inn Say Hain
Huzoor Duniya Mian Maujood Pehly Din Say Hain
#ShahzadQais
****************************************
گنجینۂ جمال کی خوشبو ہیں اِہلِ بیت
****************************************
گنجینۂ جمال کی خوشبو ہیں اِہلِ بیت
گُل اُن کی ذاتِ پاکؐ ہے اَصحاب تتلیاں : گل دان
#شہزادقیس
.
Ganjeena-e-Jamaal Ki Khushboo Hain Ehl-e-Bait
Gul Unn Ki Zaat-e-Pak Hai Ashaab Titliyan
#ShahzadQais
****************************************
محمدؐ گلابوں سے لکھا ھوا تھا
****************************************
محمدؐ گلابوں سے لکھا ھوا تھا
گلابوں کی خوشبو بہت بڑھ گئی تھی
#شہزادقیس
.
Muhammad Gulaabon Say Likha Howa Tha
Gulabon Ki Khushboo Bohat Barrh Gai Thi
#ShahzadQais
****************************************
شاعر: #شہزادقیس ، مجموعہ کلام: #الہام
#QaisIlhaam #ShahzadQais
*** *** *** *** *** *** *** ***
پی ڈی ایف اس جگہ پہ ہے موجود
http://sqais.com/QaisIlhaam.pdf
*** *** *** *** *** *** *** ***
اور کُل متن بھی یہاں پر ہے
http://sqais.com/QaisIlhaam.html
شب دُعاؤں میں یاد رَکھیے گا
پُرسکون اور مسکراتے رہیں
#شہزادقیس

Submit "ظہورِ نورِ مکمل بہت مبارک ہو" to Digg Submit "ظہورِ نورِ مکمل بہت مبارک ہو" to del.icio.us Submit "ظہورِ نورِ مکمل بہت مبارک ہو" to StumbleUpon Submit "ظہورِ نورِ مکمل بہت مبارک ہو" to Google

Categories
ShahzadQais

Comments

  1. Rose's Avatar
    جزاک اللہ
    سارا نعتیہ کلام خوبصورت ہے۔
  2. Aleesha's Avatar
    jazak Allah
  3. 1UM-TeamUrdu's Avatar
    Quote Originally Posted by Rose
    جزاک اللہ
    سارا نعتیہ کلام خوبصورت ہے۔
    بے حد شکریہ ۔ سدا ممتاز و مکرم رھیے
  4. 1UM-TeamUrdu's Avatar
    Quote Originally Posted by Aleesha
    jazak Allah
    بہت شکریہ ۔ سدا ممتاز و مکرم رھیے
  5. Kainat's Avatar
    اِتنا خوش رَنگ کہ خوابوں کا نگر لگتا ہے
    گنبدِ سبز سے یہ شہر گہر لگتا ہے
    ۔۔۔۔۔
    واہ کیا بات ہے شہر مدینہ کی،
    ماشاءاللہ بہت خوبصورت کلام ہے۔ اور ایک تھیم پہ ڈھیروں اشعار لکھنا آپ کا کمال ۔
    اللہ کرے زورِ قلم اور زیادہ،
  6. HumairaCh's Avatar
    جزاک اللہ خیرا بھائی
  7. Rubab's Avatar
    معراج تھی فرشتوں کی حیرانگی کی رات
    بے پر بھی اُترا قیسؔ ، فلک پر نبیؐ مِرا

    جزاک اللٰہ
    بہت خوب ٹیم بھائی